//夏天遊英國不失禮 10項與香港不同的夏日文化
雖然我好討厭大風嘅英國，但聽聞香港已經熱到大汗耷細汗，我又回想起以前係屋企沖完涼3秒邊冒汗邊着衫；又諗起化好個妝落樓等巴士返工，妝溶到七個一皮咁發火等那架20分鐘一班的962B。我都真心幾鍾意英國嘅夏天。如果你都打算今個夏季遊英國，就要留意同香港好唔同嘅夏天文化。
👉1. 太陽眼鏡
同香港唔同，英國少高樓大廈，太陽毫不留情直曬你全身，係一種唔會令你輕易出汗嘅乾蒸。唔戴太陽眼鏡，你預左要長期皺眉瞇眼臉帶痛若咁睇路。
如果自駕遊揸車，太陽會掁眼到你完全睇唔到前方，係極危險之事。所以太陽眼鏡係英國，係100%好重要。
👉2. 酒店住宿
夏天係英國的旅遊旺季，唔止遊客，連本地人都會全國自由流動來個小假期。所以住宿係絕對地容易爆滿，尤其你想住近市中心。唔想無床位、挨貴租，記得早點訂房。
👉3. 蚊蟲蜘蛛
香港夏天蚊患，英國嘅夏天有蜘蛛患。大中小，腳長腳短，腳粗腳幼的阿辣哥我都見過。英國人相信蜘蛛係食小昆蟲嘅益蟲，唔會見到即殺。最好的方法係用隻玻璃杯Cup著，再攝杯墊係底，送佢地出門口。
至於蚊，唔可以話無，但少之有少，我2年前帶咗支無比滴黎英國都無用過。
👉4. 沒有冷氣
英國是為應付寒冷而建的國家，絕大部的住所/餐廳都是沒 有 安 裝 冷 氣 的。如果你知道你來的日子將會遇上歐洲熱浪，或者你本身好怕熱，訂酒店前最好看清楚有沒有空調或風扇。我試過入住沒有冷氣的旅館，每晚冒着汗入睡，再冒着汗起床，絕無誇張。
如果住得起倫敦的酒店，那是有冷氣的，不過預咗係低溫度冷氣，熱你唔死，但絕對無吹冷氣的快感。
👉5. 防曬
香港人的防曬程度應該勁過英國人好多。我本身黑底，曬唔傷但一曬即黑。上年無搽防曬去野餐一日，膀頭馬上燶咗。我見好多英國人曬到紅曬出水泡。英國太陽唔容易令你出汗，不過唔聲唔聲毒到一個點。
👉6. 天黑
英國的夏天是不夜國，現在5月份大概9點天黑，到7至8月大嘅10/11點才天黑。但早上3/4點就天光了。如果你的旅館沒有遮光窗簾，那恭喜你，可以早點起床了。
順帶一提，英國有夏令時間，比香港慢7小時。
👉7. 溫差
夏天的英國很棒很熱對不對？錯！早晚的溫差會極容易令你生病。中午的太陽很溫暖，但太陽伯伯一下班，微風吹起，感覺猶如香港的秋天。唔想一冷一熱病，記得帶定外套。
👉8. Pub Food
英國飲酒的地方有分Pub及Club，後者係喜愛夜𥮉搵食之地，前者係幽靜有酒飲有正餐食的地方。英國的 Pub Food唔貴之餘仲好方便，營業時間長，假日都開放。
如果假日去到小城，餐廳好大機會休息，呢個時候就有Pub Food打救你。
👉9. Summer Sales
同香港一樣，英國一年四季都會做減價。除了聖誕，Summer Sale算減得厲害。部份品牌甚至新貨都會有折。最正係就算係減價品，買完唔啱都可以有20-28日退貨保證。
👉10. 難得飛到咁遠，玩得開心點喔 😘
－－－－－－－－－－－－－－－－－－－
👊 Follow IG一齊遊英國❤ 會分享不太一樣的日常
IG: instagr.am/misswinterinuk
－－－－－－－－－－－－－－－－－－－
//夏天遊倫敦，必睇以下旅遊片：
🇬🇧 【參加Bath＋巨石陣一日遊】
https://goo.gl/MnyB1R
🇬🇧【倫敦市區$150住宿】
https://goo.gl/v8NPa3
🇬🇧【倫敦交通片－蠔卡vs. Daypass邊款抵】
https://goo.gl/6ALvoT
🇬🇧【倫敦勁好食龍蝦包】
https://goo.gl/VujpuZ
🇬🇧【倫敦高質日式餐廳】
https://goo.gl/w9TX24
Search